Alvaro Usabiaga (Pedagogoa, Lahar Elkargoa)
Guraso eta seme alaben artean komunikazioa on bat izatea beharrezkoa da. Komunikazio on batek harremanak bultzatzen ditu, errespetu eta maitasuneko giro bat sortuz.
Pertsonen arteko harremanetan elkarrizketa garrantzitzua bada, are gehiago familia barneko komunikazioan. Komunikazioak besteekin harremanetan jartzeko aukera ematen digu, gure artean informazioa eman edo jaso eta horrela gure sentimendu eta ideiak adierazi.
Gizakion arteko komunikazioa modu ezberdinetan suertatu daiteke, horrela ahozko komunikazioa (ahoz eta idatziz esaten duguna) eta ez ahozkoa (begirada, keinuak…) desberdindu ditzakegu. Gure seme alabek gure mezua garbi jaso dezaten, bai ahoz dioguna eta baita gure ez ahozko komunikazioa (hitzegiterakoan erabilitako tonua, keinuak…) uztarturik joan behar dute. Bi komunikazio hauen artean aurkakotasuna badago, seme-alabengan nahasmena sor dezakegu, gureganako konfidantza galaraziz.
Guraso eta seme-alaben arteko komunikazioan gure jarrerak ere eragin haundia dute, horrela umearen beharrak kontutan hartu gabe oihuak eta meatzuak erabiltzea (“gela txukundu edo ikusiko duzu”, “etorri hona!!”…), errua sentiaraztea (etengabe hizkuntza negatiboa erabiltzea: “hori ez egin mina hartuko bait duzu”, “oso traketsa zara”…), umeek egiten edo esaten dutenari garrantzia kentzea (“ez da hainbesterako izango”, “ez kezkatu”…), hitzaldiak ematea (“…egin beharko zenuke”) edota orokortasunak erabiltzea (“inoiz ez dituzu arauak betetzen”, “beti gaizki portatzen zara”…) bezalako jarrerak komunikazio hori oztopa dezakete, ez bait dute umea baieztatzen.
Guzti honen aurrean, gure seme-alabekin komunikazioa hobetzeko lehenengo pausua gure komunikazio estiloaren jabe izatea da.
Bestalde komunikazio hau hobetzen lagun gaitzaketen beste tresna (jarrera) batzuk ondorengoak izan daitezke:
~ Prest egon: guraso eta seme-alabak egunean zehar elkar egon eta hitzegiteko denbora bat izatea, nahiz eta ez denbora gutxi izan, beraien arteko harremana indartzea suposatuko du.
~ Entzuten jakitea: gure seme-alabek esaten digutena modu aktibo eta hausnarkorrean entzuteak, beraiengan entzunak eta onartuak direlaren sentsazioa suposatuko du.
~ Enpatia eta maitasuna adieraztea: haien lekuan jarri, bere sentimenduak ulertzen dituzuela jakinaraziz. Nahiz eta batzuetan ez guztiz ados egon.
~ Eredu on bat izatea: umeek gurasoen portaerez hauek diotenaz baino gehiago ikasten dute (imitazioz jokatzen dute), beraz guk etxean erabili eta hartutako jarrerak eredu izan behar dute gure seme-alabentzat.
~ Positibo izatea: hizkuntza baikorra erabiltzeak umearengan eragin positiboak sortaraziko ditu.
~ Parte-hartzea suztatzea: galderak eginaz eta gai ezberdinei buruz beraien eritzia eskatuz.
Bidea zaila bada ere, estrategia hauen erabilerak gertutasun, harmonia eta ulermen giro bat sortzeko laguntza izan daitezke, guraso eta seme alaben arteko harremanak sendotuz eta gurasook dugun etengabeko lanean lagunduz.